Seiteninhalt
21.01.2020

63. Plattdüütsch-Forum Kreis Herzogtum Lauenburg hett sik in Ratzborg drapen

Anne Fenske,  Plattdüütschbeupdragte von de Stadt Ratzborg hett vergangene Week de Maaten vun dat Plattdüütsch-Forum Kreis Herzogtum Lauenborg to ehr 63. Sitten in Ratssool vun dat Ratzborger Rathuus willkamen heten. Das Plattdüütsch-Forum geit vun een Initiative vun Helga Walsemann, Nedderdüütschbeupdragte vun den Kreis Herzogtum Lauenborg trüch. Dor drapt sik all Plattdüütschbeupdragte vun de Ämter un Städte, üm Erfohrungen uttotuschen un Projekte in Gang to setten, üm dat Plattdüütsche lebennig to hollen. Veele Aktivitäten in Kreis sünd dormit in Leven ropen worrn, to´n Bispel plattdüütsche Kinnernamiddage mit groder Beteiligung in mehreren Ortschaften vun den Kreis un de Aktion „Plattdüütscher Harvst in´t Lauenborgsche 2004“, de to veelen Veranstaltungen föhrt hett.

Düssen düchtige Ansatt hett Bürgermeister Gunnar Koech würdigt. Er hett de rund 20 Maaten vun dat Forum persönlich willkamen heten: „Veelfalt is överall in Leven een Bereicherung. Dat gilt besünners ok för de spraakliche Veelfalt .Geven doch de Spraken in ehr eegenen Formen för uns Gedanken eenen ünnerscheedlichen Utdruck. Besünners dorüm is de Veelfältigkeit vun de Spraken een hoges kulturelles Goot, dat dorüm to beschütten un lebennig to hollen is, wi all anner Kulturgoot ok."

Up de Sök na Ideen, üm Plattdüütsch lebennig to hollen, ward ok faken Gäst in dat Plattdüütsch-Forum inladt. So hett bi de letzt Sitten Johanna Bojarra vun Heimatbund Mecklenburg-Vorpommern e.V. de „Zeimatschatzkiste“ vörstellt. „Dat Projekt „Heimatschatzkiste“ sett wi siet Herbst 2016 in Heimatverband üm. Dat is een Deel vun Landesprogramm „Meine Heimat – Mein modernes Mecklenburg-Vorpommern“, dat heimatkundliche Inhalte un de Vermittlung vun de Regionalspraak Nedderdüütsch in de Bildungsinrichtungen in Land Mecklenburg-Vorpommern fördert. Mit de „Heimatschatzkiste“ hett de Heimatverband de Verantwordung för de fröhkindliche Bildung övernamen. Mehr as twee Johr hebbt wi konzipiert und produziert, üm 2019 an all Kinnerdagesinrichtungen im Land MV eene dulle Materialsammlung utliefern to können,“ hett Johanna Bojarra vertellt. Heimatliche Lerninhalte, de Natur, Landschaft Landwirtschaft, Kunst, Musik, Kultur, Geschichte, Bräuche un Traditionen un ok dat aktuelle Levensümfeld vun de Kinner ümfat, billen den Kern vun de Heimatschatzkist. Ok ward Material erstellt, womit speelerisch Nedderdüütsch as Fremdspraak vermittelt warrn kunn. De anspraakenen Öllersstuffen riegt vun de Krippen över den Kinnergorn bit hen to´n Hort.

In Ansluss hett Stadtarchivar Christian Lopau den nien Bildband vun de Stadt Ratzborg vörstellt, na kloor up Platt, wenn ok de Bildband  blots up hochdüütsch rutkamen is.

De Plattdüütschbeupdragte ut Ratzborg Anne Fenske wörr mit den Verlop un de Resonanz över de 63. Sitten vun dat Plattdüütsch-Forum bannig tofreden: “Dat is doch jümmers wedder motivierend, sik över de gemeensame Arbeed uttotuschen un vun nien gooden Ideen to hören, dormit Plattdüütsch grood bi de junge Generation vermittelt warn kunn."