Veel to doon för de Ratzbörger Plattdüütschbeupdragte
De Plattdüütschbeupdragte ut Ratzborg, Annegret Fenske, hett ok dat letzte Johr wedder mit veel Insatz to´n Bestand vun de plattdüütsche Spraak bidragen, wat se nülich up de Ratzbörger Stadtvertretung seggen kunnt.
To ehre Upgaven tälten u.a. de Utrichtung vun een plattdüütschen Kinnernamiddag in Burgtheater in Ratzborg, de Besök vun dat Plattdüütschforum in Börnsen, Borstorf, Böken un Duvensee un de Besök vun de Veranstaltung „Platt för hüüt un morgen, Autorentreffen plattdüütscher Schrieverslüüd, utricht vun dat Zentrum för Nedderdüütsch in Mölln.
Dörch ehren Kontakt to de Nedderdüütsche Böhn Schönbarg gäv dat een plattdüütsches Theaterstück mit den Titel „Geld ut Schiet“ in Burgtheater in Ratzborg to seien.
As Plattdüütschbeupdragte wör Annegret Fenske ok wedder Jurymitglied bi den plattdüütschen Vörlesewettbewerb „Schölers leest Platt“ in de Bökeree in Ratzborg.
Eng wör ok de letzte Tied de Tosamenarbeet mit Ingrid Bindzsus, Plattdüütschbeupdragte vun de Scholen in den Kreis Herzogtum Lauenborg, üm niee Ideen to finnen, damit dat Plattdüütsche in dat Alldagsleven präsent blifft.
„Sied ca. een Johr schriev ik Lüüd ut Ratzborg to Diamantenen Hochtied u.ä an. Man glövt gor nich, wat de ölleren Lüüd sik över sowat freut. De ropt mi an un bedankt sik bi mi.
Ok gifft dat sied een poor Mand plattdüütsche Ansichtskorten, de wi in uns Tourist-Info verköpen könnt“ gifft Annegret Fenske een poor Bispeele, wi dat mit dat Plattdüütsche funktionieren kann.
