Seiteninhalt
24.03.2016

Plattdüütscher Vörlesewettbewerb in de Bökkeree in Ratzborg

Plattdüütscher Vörlesewettbewerb
in de Bökkeree in Ratzborg
Schoolwinner sünd gegeneinanner antreden

Dat dat lohnt, sik up de plattdüütsche Spraak intolaten, hebbt 13 Deerns un Jungs an 16. März in de Stadtbökkeree Ratzborg unner Bewies stellt. För veele Tokiekers hebbt de Schoolwinner ut 3. – 4. un 5.-7. Klassen ut den ganzen Kreis plattdüütsche Texte vörlest, üm sik för den Regionalentscheed an 28. April in Mölln to qualifizieren.


Gruppenfoto mit all Deelnehmers un de Lüüd vun de Jury
Achterne Reeg vun links: Jury-Vörsitter Thorsten Börnsen, niee Leiter vun dat Zentrum för Nedderdüütsch in Lannesdeel Holsteen, Christian Lopau, Stadtarchivar vun de Stadt Ratzborg un Mölln, Lena Ludewig ut Wendörp – Winnerin vun de 5.-7. Klass, Annegret Fenske und Brigitte Koscielski – Plattdüütschbeupdragte ut Ratzborg

Fri na dat Motto „Platt – ik bün dorbi“ ward de Wettbewerb all twee Johr vun den Schleswig-Holsteenischen Heimatbund un de Sporkassen up de Been stellt un ünnerstützt.

Grotes Lob gev dat an End för all de Deelnehmers vun de veer Jury-Mitglieder an twee Deerns, de wunnen hebbt. De Grundschölerin Hannah Rüsch ut Ratzborg hett in ehr Altersgrupp wunnen, de mit veelen Sommersprossen in Gesicht de Geschicht „Pippi geiht na School“ lebendig vördragen hett un Lena Ludewig vun Wendörper Gymnasium mit den Text „Man bloß en Drom“.


Hannah Rüsch ut Ratzborg, 9 Johr, Winnerin vun de 3.-4. Klass

De beeden jungen Plattsnacker hebbt nu de Chance bi den groten Lannesentscheed in Juni up de Sporkassenbeun vun de Lannesgordenschau in Eutin to winnen.